Karfe A Wuta

Ɓoye hodar ya yi, gabansa na tsananta faɗuwa ya nufi ƙofar ɗakin, yana tambayar waye?. Shiru ba a bashi amsa ba, aka ci gaba da bubbuga ƙofar.
Ya buɗe ƙofar, yana buɗewa aka hankaɗo ƙofar, jami'an tsaro suka shigo cikin ɗakin, aka hau caje ɗakin.

Ba ma wadda ya buɗe suka gano ba, wata jaka suka ɗaukko, ana zazzageta sai ga miyagun ƙwayoyi da hodar iblis a ciki.

Rantse rantse indabo ya fara, cikin matsanancin tashin hankali, ya rasa ma me zai ce, suka saka masa ankwa, suka ingiza ƙeyarsa suka tafi da shi.

****
Nabila na ta rawar ƙafar shirin bikin Sumayya, sai dai jikinta gaba ɗaya babu daɗi, wani irin nauyi jikinta yake yi mata ga kasala.

Shahara da ɗaukakar da ta yi, ya sanya take samun manya manyan case, amma yanayin ɗawainiyar aure, ya sanya ta fara sarewa, gaba ɗaya jin ta take ba a dai-dai ba.

Suka shirya ita da Viper ta kai shi gidan ramma, ta ji daɗi sosai da sosai da zuwansu, dan ranar Abdul ma bai fita ba, da ta gaya masa za su zo.

Abincin da ramma ta yi, Nabila ta ce ba ta ci, wai ta dafa mata indomie ta cika attaruhu ta bata.

Ramma ta yi murmushi, ta ce mata to, ta dafa ta bata, ta ji daɗin indomien sosai da sosai, dan a gida ba ta iya cin abinci.

A hanyar komawa gida, ta saka Viper ya saya mata ƙosai, suka je gida ta dirarwa ƙosan nan, ta din ga ci da yaji tana suɗar baki.

Ya dawo daga sallar isha'i, ya tarar ta kashingiɗa, tana ta lasar lemon tsami.

"Abla, idan ki ka ce mini cikin ki yana ciwo, ko kuma ulcer, ko saurararki ba zan yi ba, kalli yadda ki ke azabtar da kanki da yaji, ina kallonki har da barbaɗa yaji a kam man ƙosai kina lasa, yanzu kuma kina shan lemon tsami ko?"

"Vi dan Allah kar ka yi mini baki mana"

"Ni dai na gaya miki ne"

Aikuwa hakan ce ta faru, kwana ta yi tana yawon banɗaki, atini ya sakota a gaba, ga amai. Yana kallonta ya yi mata banza ya sha baccinsa da daddare.

Da safe ma da kyar ta yi masa breakfast, almajirinta ta aika chemist ya sayo mata ruwan gishiri da suga ta haɗa tana sha. Gaɓoɓinta duk suka sage, wunin ranar ta kasa cin komai, indomien da ramma ta ba ta ce kawai take dawo mata.

Cikin dare yana jin motsinta, tana ta sintirin toilet, har ya basar sai ta bashi tausayi, yadda gari yayi tsit sai kakarin amanta kamar zata amayar da kayan cikinta.

Ya je ya sameta a zaune dirshen a banɗaki, duk ta fita hayyacinta. Dolensa ya fita ya bugawa maƙwabcinsa ƙofa yana da abin hawa suka tafi da Nabila Asibiti.

Kwantar da ita aka yi, fatarta duk ta bushe ta zama dehydrated, leɓenta ma ya bushe sosai.

Abinka da farin mutum, sai tayi busu-busu kamar korarriya.

Ga tausayinta ga dariya ta bashi, iya sintirin banɗakin da ta sha ma, ya isheta punishment.

"Abla ko a sayo ƙosan ne?" Murguɗa masa baki ta yi, ta lumshe idanunta, saboda har a lokacin cikinta hautsunawa yake yi.

Da safe Abdul ya shigo, yana ward round kawai ya ga su Viper.

Ya ce "Ya aka yi ba a kirawo ni ba? Daga tafiyarku shekranjiya har jikinta yayi haka?"

Viper ya ce "Eh, likitan da muka tarar yayi mata duk abin da ya kamata ai, ba ta ji ne, ka ga gobe ba ta kuma ba, ba zata ci abinci ba, sai ta zabga yaji, abincinma sai ta gama zaɓe-zaɓe, ko ba komai ai ta hanamu bacci, in da na ji daɗi ta ji a jikinta ai, nan ɗin ne yafi mana kusa shiyasa kawai muka yo nan"

Abdul ya yi murmushi ya ce "Gaskiya yakamata a tausaya mata, wataƙila baby ne ya saka take hakan, bari na yi reviewing ɗin ta" ita dai ba ta san me ake yi ba, bacci ya sake ɗaukar ta.

Gwajin farko ya tabattar da Nabila na ɗauke da juna biyu, dama Viper jikinsa ya bashi, sai dai bai tabattar ba ya bar abin a zuciyarsa.

Abdul ya ce "Ka ga babynka ne ya sakata cin yaji, ka ke mata dariya".

Cikin farinciki Viper ya ce "Har da rigimarta, da kafirin kwaɗayinta"

Ya rasa in da zai saka kansa dan murna, shi yana ta farinciki, Nabila na fama da kanta, atini ya tsaya amma jiki babu ƙwari.

Sai yamma aka sallame su, Abdul ya ɗauke su a mota zai kai su gida.

Duk in da aka tsaya sai ta ce Viper ya saya mata abu, duk sai dai ya kashe kuɗin jikinsa.

Tun da suka koma gida kuma, Nabila ta kwanta laulayi sosai da sosai, ba ta cin komai, amai ya sakata a gaba, ga zazzaɓin dare. Jauhar ta yi laulayi ita ma, amma Nabila ta fita laulayi nesa ba kusa ba, ko fita ta daina yi, sai lokaci lokaci.

Viper ne yake ta kula da ita, yana roƙon Allah ya kare masa ita da abin da yake cikinta su rabu lafiya.
Ya sanya yana da rabon ganin ɗan sa a duniya.

Sosai Viper yake ba ta mamaki, mutum ne mai tausayi, sai lallaɓata yake yi.

Ranar wata juma'a, aka ɗaura auren Abbu da maman ramma, hakan ya yi wa Viper daɗi sosai da sosai, su Major, Baba duk sun halarta, a wurin ɗaurin auren Major ya haɗu da mahaifin liti.

Classmates ɗin sa ne, tare suka yi karatu, tun lokacin secondary school, sun yi zaman mutunci, ɗakinsu ɗaya kuma kwanarsu ɗaya, tare suke komai.
Rashin wayar hannu a wancan lokacin ya sanya zumuncin na su bai ɗore ba, nan hira ta wanzu tsakaninsu, hirar yaushe rabo, da hirar ƙalubale da kuma nasarorin da suka samu a rayuwa.

Rahila tana ji tana gani, aka ajiyeta a gidan masu rangwamen hankali, Abbu kuma ya yi aurensa.

'yan kwanakin nan, kusan kullum idan Zakiyya ta kwanta bacci, sai ta yi mafarki da Chubaɗo, hannunta rungume da jarirai guda biyu, ɗanyen haihuwa, ƙafafuwanta duk jini, tana kallonta tana kuka.

Tun da ta rasu, ba ta taɓa mafarki da ita ba sai a wannan lokacin, da fari ta maze ta basar da mafarkin, amma kuma ta ci gaba da yin sa a kai a kai, har ya zamana tana yi mata gizo a zahiri.

Abu kamar wasa, ba iya ita take gani ba, wasu lokutan har da jauhar,  idan ta hange su, su na zaune su na cin abinci, da sun hangota sai su nufota.

Kafin wani lokaci, ta yi wata irin rama, abin duniya ya isheta, ta kasa gaya wa kowa halin da take ciki, ba ta iya cin abinci, ga wata irin fargaba da faɗuwar gaba, sai ta din ga ganin kamar ita ma mutuwa za ta yi a kowane lokaci.
Gaba ɗaya ta ji duniya tayi mata zafi, ba ta son komai, ba ta jin daɗin komai, ta tsangwami kanta kuma ta kasa gaya wa kowa halin da ake ciki, gashi tana murna yanzu miji ya zama nata, tun da mama na kwance tana jinya, amma ita ma ta kasa jin daɗin rayuwar gaba ɗaya.

Kafin Viper ya auri Nabila, kallon mace mai son jiki yake yi mata, kai ba ka ce ta iya wani abu ba, saboda yadda take a sangarce, amma sai ya ga abin da ba haka ba, sam ba ta son ƙazanta, idan ya rage mata aikin gida ya fita, idan ya dawo a hakan zai tarar ta lallaɓa jikinta, ta gyara ko ina, har ma ta yi girki.

Kayansa za ta saka a inji ta wanke ta shanya, su bushe ta bayar a goge masa.

Sosai yake jin tausayinta, gashi lokacin komawarsa bakin aiki yayi.

Cikin kulawa ya ce "Abla ko dai tare zamu tafi ne, ko na tafi hankalina ba zai kwanta ba saboda yanayin jikin nan naki"

"Komawa zaka yi, babu wani abu da zai faru in sha Allah"

"Yanzu ko a gidanku, babu wani wanda za a baki, ya zo ya tayaki zama?"

Tayi murmushi ta ce "Maraicin kenan Vi, ba sai na gayyaci kowa ba, na san ba bani za su yi ba, Sumayya ce dai ta ce mini za ta zo idan ka tafi, kar ka damu zan iya zamana"

Cikin kulawa ta ce "Abla ba kya cin abinci ai, duk kin yi wani iri" yayi maganar yana shafa wuyanta. Langaɓe masa ta sake yi, daurewa kawai take yi ne, dan kar ya ƙara shiga damuwa, dan kuwa har kuka take ɓuya tayi, ganin yadda ba ta iya cin abinci, kullum cikin amai take.

Shi kansa Viper sai da ya tambayi Abdul, ko akwai maganin da za a bata ta daina aman nan, ya ce masa sai dai ayi haƙuri, lokaci ne zata daina.

Lokaci lokaci, ramma sai ta yi girki, ta ba wa Abdul ya biya ya kai wa Nabila.

Har Viper ya tafi, hankalinsa yana kan Nabila da ya bari, Sumayya ta kan zo ta ɗan tayata zama ta kwanar mata biyu, ita kanta tana jin tausayin Nabila dan wani irin wahalallen laulayi take yi.

Sai dai duk da halin da take ciki, kasancewar 'yar dagiya ce, bai hanata kasawa tare da tsarewa ba, a duk lokacin da za a gabatar da shari'ar Naja'atu Bunkure ba.

Dan ranar farko da Bunkure ta ga Nabila, sai da haɗuwarsu ta farko ta dawo mata, bayan gama saurara Shari'a sai da Nabilan ta bita, ta ce "Allon kwaikwayona, ina fatan a yanzu kin tabattar da Allah ne mai yi, babu ruwansa lokacin da ya so, zai iya ɗaukko na can ƙasan da ba a iya hango shi, ya ɗaukaka shi sai kowa ya ji shi, hakazalika ya ɗaukko na can saman ya kai shi ƙasa, sai kowa ya manta da shi.
Ba zan ci gaba da bibiyar shari'arki dan fatan na ga bayanki ba, sam, na gama nawa tun da na kai ki ƙasa, na bayyana wa duniya wacece ke, zan bibiya ne saboda hakkin mutane da kuma jinin 'yar uwata da ki ka ce ya tafi a banza" Bunkure ba ta iya mayar da martani ba, aka zunkuɗata cikin motar masu laifi, aka tafi da ita.

*****

Duk ƙumbiya-ƙumbiyar da ake yi, da ƙoƙarin rufe abin da ya faru, sai da abun ɓoye ya bayyana na kama Indabo da miyagun ƙwayoyi a ƙasa mai tsarki.

Ramma tana zaune a falo, tana assignment, Abdul ya shigo babu ko sallama, ya wuce ɗaki.

Ta bi bayansa tana faɗin "Yau kuma waye ya taɓo mini bokan turai" idanunsa ne suka tabbatar mata akwai damuwa gagaruma.

"Doctor meyafaru kuma? Wani abin ne ya faru?"

Ya haɗiye wani abu mai ɗaci, ya dubeta ya ce "Daddy aka kama a Saudiyya"

Ramma ta ce "Subhanallah, me ya yi aka kama shi?"

"Da miyagun ƙwayoyi aka kama shi, abin takaici wai a ƙasa mai tsarki"

Ramma ta ce "Subhanallah, abin bai yi daɗi ba. Addu'a ce yanzu ya kamata ayi, Ubangiji Allah ya fitar da shi"

Ya kalli ramma idonsa fal hawaye ya ce "Allah ya fitar da shi how? Saudiyya ba fa Nigeria ba ce ba, duk laifukan da yake aikatawa ba su isa ba, sai ya tsallaka ƙasa mai tsarki?. Har tsoro nake ji, ko idan ya koma ga Allah idan na roƙa masa rahama Allah zai karɓa? Tarin mutanen da zalunta saboda kujerar nam, a ina zai gansu ya nemi afuwarsu? Ni iyayena ne jarrabawata, da ina da iko, da ban zo a tsatsonsa ba"

Cikin kulawa ramma ta fara rarrashin da bai kai zuciyarta ba ta ce "Doctor, ba a yanke tsammani da rahamar Allah, kuma shi mai rahama ne, dole a roƙa masa rahama tun da musulmi ne"

"Amma kin san Allah baya yafe hakkin wani a kan wani ko? Yau ko tuba yayi ya daina laifukan da yake yi, waɗanda ya zalunta fa wasu ba sa duniyar nan, sun bar ta, a wurin wa zai nemi yafiyar? Mutanen da ya dasawa damuwa da baƙin ciki su na da yawa fa.
Allah mai rahama ne da jin ƙai, amma sai da ya haramta shi a kan kansa, sannan ya sanya shi abin haramtawa a tsakaninmu, ke ki ka biya mini wannan hadisin, ni babu wani abu da za a gaya mini yanzu na ji sanyi, ina tausaya masa haɗuwarsa da Allah"

Jiki a sanyaye ramma ta ce "Ka yi gaskiya, amma yanzu ai ba mutuwar yayi ba"

Ya kalleta fuskarsa duk hawaye ya ce "Kin san hukuncin ace an kama mutum da irin abin da aka kama shi da shi a ƙasa mai tsarki? Muddin suka tabattar hukuncin kisa ne" gaba ɗaya sai ta rasa me ma za ta ce. Har ga Allah Abdul ya bata tausayi, amma ita ba ta ji ta damu ba ko kaɗan, albarkacin Abdul ɗin ne ma bai sanya ta ce Allah ya ƙara a zuciyarta ba.


****

Hafsa ta biyo Alhaji mu'azzam, domin kawo ziyara gida, sai dai ta tsorata da yadda ta ga jikin mama ya ƙara tsananta, ta zama wata irin miskiniya abin tsoro.

Sai dai ta tsorata da ganin ita ma tata mahaifiyar ta yi wata irin muguwar rama, gashi duk kauɗinta yanzu ba ta son yin magana.
Ga zaman ɗaki, cikin mamaki take tambayarta ko lafiya?

Ta fashe da kuka take gaya wa Hafsa abin da yake faruwa.


Tayi shiru sannan ta ce "Ikon Allah, kin ga kaɗan daga illar biye-biye anty, yanzu an ce Anty Rahila tana gidan masu rangwamen hankali, ni na fara yin ciwon hauka a sanadin shaye-shaye, ke ma kuma ga alamu"

Ta waro ido ta ce "Hauka kuma?"

"Eh matsalar ƙwaƙwalwa, wannan alamomi ne na depression"

"Wallahi na yarda da maganarki, wasu lokutan ji nake kamar na fita da gudu ina ihu, duniyar tayi mini zafi, amma ni sai nake tunanin ko matar nan ce duk da tana kwance, ta haɗa kai da yaranta suke banko mini asiri"

Hafsa ta katseta ta ce "Mama babu wanda yake banko miki wani asiri, ganin Jauhar da mahaifiyarta da ki ke yawan yi, yana alamta miki, kin tafka mummunan laifi a rayuwarki, da babu lallai sun yafe miki, gashi ba sa duniyar. Shawara ɗaya zan baki, ki din ga yi musu addu'a, sannan ki dage da istigfari kuma ki daure, ki nemi afuwar Baba, sannan ki nemi afuwar ɗan uwanta babansu Nabila, da ita kanta Nabilan, tun da duk su na da alaƙa da su, idan ki na so ki samu nutsuwa. Sai kuma mu dangana da asibiti ki fara ganin likita"

"Tabɗijan, kawai kuma sai na je ina cewa wani su yafe mini, da na yi musu me? Wallahi ba zani ba"

Cikin takaici da mamaki, take bin Antyn da kallo, ta ce "Ba zaki ba Anty, sai abin da ya samu babar su Shahida ya same ki tukuna?"

"Ya daɗe bai same nin ba, ba zani ba, ni na san asiri kawai ake yi mini, kuma ni dai-dai nake da kowane mara mutunci" Duk yadda hafsa ta so ganar da ita, ta rufe idonta taƙi ganewa.

"To mu je asibiti, tun da nima kin ga da haka na warke, da aka din ga kai ni Asibiti"

"Ba zani ba shi ma, ni na san maganin matsalata" haka Hafsa ta ƙyaleta, dan babu yadda ta iya da ita".


Washegarin zuwanta ta tafi gidan Nabila, tayi sa'a Sumayya ma tana can, haɗuwar ta su ta yi musu daɗi, sai dai a kallon farko ta ga Nabila ta rame sosai, ba ta yi magana ba, Nabila nata nuƙu-nuƙu da hijjabi, amma sai da Hafsa ta gano ta.

"Abla, wai me ki ke ɓoyewa ne? Duk ɓoyonki ana gani ai"

Kunya ta kama Nabila ta ce "Ake gane me?"

"Ɗan baban mana"

Sumayya ta kwashe da dariya ta ce "Ai na gaya mata ana gani, taƙi yadda, mai cewa sai ta yi good 2yrs a gidan miji, kafin ta ɗau ciki, amma farawa da bisimillah"

Hafsa ta kwashe da dariya ta ce "Ai kura ta san gidan mai babban sanda, ai ita ta san in da za ta iya cewa, sai ta shekara biyun ba ta haihu ba, ba dai a gidan Viper ba"

Nabila ta ce "Baku da aikin yi ne, ulcer ce ta kumbura mini ciki"

"Viper dai yayi ajiya, shi ya kumbura miki cikin" Hafsa tayi maganar tana dariya.

"Ku da Allah, kuna munafuncin mijina a gabana, wanda idan yana nan, ko tarin kirki ba zaku iya ba, a ƙyale mini shi kar a saka ya ƙware, yana can yana aiki, kuna nan ku na gulmarsa"

Hafsa ta ce "Ke abin alkhairi ne ai, Ubangiji Allah ya inganta miki ƙanwata, ya rabaku lafiya"

"Amin Anty hafsyna"

Sumayya ta ce "Shahida ma na ga kamar an gamu"

Hafsa ta ce "Nima ma gani, ai na je gidanta"

Nabila tayi dariya ta ce "Mijinta ce mini yayi baya son saka ido mura take yi" suka yi ta hirarsu gwanin sha'awa, hafsa ta ce "Dan Allah ku tayani da addu'a, nima Ubangiji Allah ya sa ina da rabon ganin jinina a duniya, ni haryanzu shiru" suka yi ta kwantar mata da hankali da yi mata fatan alkhairi.

Aka koma maganar bikin Sumayya, Hafsa na ta ƙara nanata mata, kar ta kuskura ta je ta sha wani abu da ba ta san menene ba, alhalin ga likitar mata.

Nabila ta ce "In dai ki na son daga shiga kema ki ɗaukko magana, ki riƙe wa kayan likitar mata wuta, zaki gane baki da wayo, laulayi is not your mate "

Hafsa ta ce "Rabu da ita, ta ji da assignment ɗin da Viper ya bata"

Nabila na daga kwance a kan cinyar Sumayya ta ce "Wuta balbal idan aka ƙira sunan mijina"

"An faɗa Aminu Viper, mai zamani"

"Ku da Allah"

Nabila ta dage ta din ga lallaɓa hafsa, sai da ta kira Alhaji mu'azzam, suka kwana a gidan.

Ita dai kaf 'ya'yan babansu, da aka nuna mata, babu wanda take jin tana so, kamar hafsa, ita dai tana ƙaunarta sosai.

Sai kuma suka koma hirar ƙalubalen rayuwar gidan auren, tare da ba wa junansu shawarwarin da za